Úrslit í spurningakeppni grunnskólanna í Hafnarfirði, Veistu svarið?, var haldin í Bæjarbíói í gær þar sem lið Víðistaðaskóla og Setbergsskóla kepptu.
Nýtt fólk kom að keppninni en spurningahöfundur og stigavörður var Einar Baldvin Brimar sem á sínum tíma keppti fyrir Setbergsskóla og spyrill var Tómas Geir Howser Harðarson sem á sínum tíma keppti fyrir Víðistaðaskóla.
Keppnin var í nokkrum hlutum, fyrst komu hraðaspurningar, síðan kom myndagáta, bjölluspurningar, villuleit og keppninni lauk með þríþraut.
Í liði Víðistaðaskóla voru Lilja Bergrós Kristjánsdóttir. Orri Kristmundsson og Steinar Logi Hallgrímsson, en þjálfari þeirra var Birkir Már Viðarsson.
Í liði Setbergsskóla voru Hrafnkell Hrafnsson, Karólína Bríet Arelakis og Reynir Örn Sigrúnarson, en þjálfari þeirra var Margrét Guðbrandsdóttir.
Lið Setbergsskóla náði tveggja stiga forystu eftir hraðaspurningarnar. 12-10 en lið Víðistaðaskóla jafnaði metin í 16-16 en Setbergsskóli komst svo einu stigi yfir í vísbendingaspurningu sem dugði þeim til sigurs.
Stigin voru mun færri en undanfarin ár en hvorugu liðinu tókst að svara nokkrum spurningum.
Setbergsskóli hampaði bikarnum annað árið í röð og fékk liðið að launum pítsaveislu og bókina Flensborg – stúdentar í 100 ár auk bikarsins sem Hafnfirðingurinn Gunnar Eyjólfsson gerði.
