Krambúðin – ný matvöruverslun í Firði opnuð á næstu vikum

Samkaup tekur við rekstri matvöruverslunar í Firði

Verslunarmiðstöðin Fjörður í miðbæ Hafnarfjarðar

Samkaup mun taka við rekstri matvöruverslunar í verslunarmiðstöðinni Firði en verslun 10-11 hefur verið lokað. Það verður undir vörumerkinu Krambúðin sem nýja matvöruverslun mun starfa og verður hún opnuð á næstu vikum.

Gunnar Egill Sigurðsson

Gunnar Egill Sigurðsson, framkvæmdastjóri verslunarsviðs Samkaupa, segir ánægjulegt að fá tækifæri til að opna verslun í Firði, enda sé þar mikil og spennandi uppbygging í gangi sem passi vel við framtíðarsýn Samkaupa. Fjörður verslunarmiðstöð hefur áform um að stækka verslunarkjarnann í átt að Strandgötu, byggja þar samkeppnishæfan verslunarkjarna og koma enn meiri lífi í miðbæ Hafnarfjarðar. Á efri hæðum viðbyggingarinnar er ætlunin að byggja hótel.

„Krambúðirnar okkar verða þar með orðnar níu talsins með þessari nýju verslun okkar í Firði en við erum nú þegar í Reykjavík, á Akureyri, Húsavík og í Reykjanesbæ. Við erum því reglulega spennt fyrir að mæta loks í Fjörðinn,” segir hann.

Gunnar Egill segir styrkleika Krambúðarinnar m.a. felast í að hún sé svokölluð þægindaverslun með langan opnunartíma en á sama tíma með allar helstu heimilisvörur á sanngjörnu verði. „Við leggjum mikið upp úr að viðskiptavinir á hraðferð geti gengið að tilboðum vísum og geti gripið með sér bita, svo sem bakkelsi sem bakað er á staðnum og take-away-kaffi. Við finnum að eftirspurnin eftir slíkri þjónustu fer sífellt vaxandi og við höfum verið að mæta þeirri kröfu með því að stækka og endurnýja verslanirnar sem fyrir voru,  en sömuleiðis fjölga þeim,  eins og við gerum nú með því að opna í Firði.

Ummæli

Ummæli