Bæjarráð samþykkti á fundi sínum sl. fimmtudag tillögu fjölskylduráðs um að tekjutengja gjald fyrir heimaþjónustu og einnig frístundastyrki eldri borgara. Var báðum tillögunum vísað til bæjarstjórnarfundar til staðfestingar.
Í dag er jafnaðartaxti fyrir gjaldskrá heimaþjónustu, 757 kr. fyrir klst.
Lagt er til að gjaldskrá heimaþjónustu verði tekjutengd með eftirfarandi hætti:
- Einstaklingur með tekjur undir 326.300 kr. á mánuði borgar 0 kr. fyrir klst.
- Einstaklingur með tekjur frá 326.300 til 391.560 kr. borgar 515 kr. fyrir klst.
- Einstaklingur með hærri tekjur en 391.561 kr. borgar 1.040 kr. fyrir klst.
- Hjón með tekjur undir 530.239 kr. borga 0 kr. fyrir klst.
- Hjón með tekjur frá 530.239 til 636.285 kr. borga 515 kr. fyrir klst.
- Hjón með hærri tekjur en 636.286 kr. borga 1.040 kr. fyrir klst.
Fulltrúi Samfylkingar situr hjá við afgreiðslu málsins í bæjarráði eins og í fjölskylduráði en lét bók að Samfylkingin væri í grunninn ekki mótfallin tekjutengingu eins og hér væri lagt til. Hins vegar var tillaga Samfylkingarinnar um að draga til baka hækkanir á gjaldskrám síðasta árs ekki tekin til formlegrar umfjöllunar í öldungaráði þar sem hún hefði átt að vera afgreidd formlega eins og aðrar tillögur sem snúa að eldri borgurum. Einnig liggi ekki fyrir nægjanlega góðar upplýsingar um þau áhrif sem þessi breyting muni hafa í för með sér.
Tekjutengdur frístundastyrkur
Þá var samþykkt að frístundastyrkur eldri borgara verði tekjutengdur með þeim hætti að aðeins einstaklingur með lægri tekjur en 391.560 kr. á mánuði eigi rétt til frístundastyrks.
Var tillagan samþykkt samhljóða í bæjarráði en fulltrúar Viðreisnar, Bæjarlistans og Samfylkingar lögðu áherslu á að ráðamenn bæjarins séu samstíga í þeim aðgerðum sem nú blasi við í ljósi aðstæðna í samfélaginu og séu því samþykkir þessari tillögu. Engu að síður leggi þeir áherslu á að málið verði tekið upp aftur og framtíðarfyrirkomulag þess skoðað vel, þegar afleiðingar núverandi ástands liggi ljósara fyrir.