fbpx
Föstudagur, febrúar 7, 2025
target="_blank"
HeimFréttirEngin svona bók er til að sögn Ingvars Jónssonar markþjálfa

Engin svona bók er til að sögn Ingvars Jónssonar markþjálfa

„Hver ertu og hvað viltu?“ er fjórða bók Hafnfirðingsins Ingvars Jónssonar

Hver ertu og hvað viltu? er ný bók eftir Hafnfirðinginn Ingvar Jónsson markþjálfa en bókin er sögð leiðarvísir fyrir þá sem vilja komast lengra.

Ingvar lauk MBA námi í Kaupmannahöfn árið 2011 en þar kynntist hann markþjálfun sem var hluti af náminu. Hann útskrifaðist síðan sem vottaður markþjálfi hér á Íslandi ári seinna og hefur starfað sem markþjálfi síðan. „Að vera markþjálfi er það sem ég er,“ segir Ingvar. „Það er þess vegna sem ég er að skrifa þessar bækur, ég hef fundið það að það er minn tilgangur.“

Ingvar er í forsvari fyrir Profectus sem sérhæfir sig í að liðsinna þeim sem vilja gera gott betur. „Langmesta eftirspurnin er í markþjálfanámið hjá okkur.“ Að sögn Ingvars hefur hann farið með Markþjálfanámið í útrás og þegar selt það á sérleyfi til þriggja landa; til Bretlands, Suður-Afríku og til Kanada. Þá kaupi menn námskeiðspakka með öllum námskeiðsgögnum sem Ingvar hefur verið að skrifa undanfarin fimm ár. Stefnir hann á að þessi námskeið verði innan fárra ára komin á yfir 20 staði þar sem hann breytist úr því að vera leiðbeinandi og markþjálfi yfir í að vera doktorsnemi í rannsóknum, skrifum og framleiðslu á námskeiðsefni inn í alþjóðlegan markþjálfaskóla Profectus.

Markþjálfun er mjög ung grein og það sem er athyglisvert við þessa grein er að upphafið má rekja til ársins 1997 þegar komu saman fræðimenn í þeim tilgangi að safna saman öllum þeim aðferðum, módelum og verkfærum úr akademíska umhverfinu sem hafa með árangur, vöxt og persónulegan þroska að gera. Stutta sagan er að þetta var sett undir eina  regnhlíf sem síðar var kallað markþjálfun.

Hvað er markþjálfun?

Ingvar segir fjölmarga ekki vita í dag hvað markþjálfun er. „Mér finnst oft best að útskýra þetta þannig: Fólk veit hvað það er að fara til sálfræðings. Þá ferðu vegna þess að það er oft eitthvað bogið eða brotið úr fortíðinni sem þarf að rétta eða laga. Þegar þú ferð til markþjálfa þá er línan dregin í sandinn á deginum í dag og við lítum á það sem er heilt, það sem er gott og það sem er sterkt, lítum til framtíðar og spyrjum; Hvert getur þú náð ef þú fengir skýra sýn og aðstoð við að greina hvernig þessi vegferð á að eiga sér stað. Það er okkar hlutverk, við erum ekkert að velta okkur upp úr fortíðinni og erum ekki meðferðaraðilar.“

Hann segir markþjálfun ganga svo mikið út á vitundarsköpun, þegar þú uppgötvar eitthvað innra með þér sem þú vissir ekki um. Hann segir að það sé ekkert vinaspjall í markþjálfun, markþjálfinn fær leyfi til að vera áskorandi og alúðarfesta einkennir samtalið.

Ingvar upplýsir að hann skrifi bækur sínar í raun sem námsbækur þó þær séu gefnar út fyrir hinn almenna lesanda, „því hugmyndafræðin með markþjálfun er einfaldlega að hjálpa fólki að komast lengra“.

Segir hann bækurnar eiga svo mikið erindi við svo marga því gríðarlegt magn drauma fái að fljóta niður að grafreit tækifæranna án þess að fá nokkurn tíman athygli þeirra sem áttu þá.

Á leið til Indlands

Ingvar heldur til Mumbai á Indlandi í febrúar þar sem hann mun halda erindi á stærstu mannauðsráðstefnu í heimi. Þar koma saman yfir 2000 sérfræðingar frá 133 löndum en erindið sem Ingvar mun flytja heitir „How to lead like a Viking“.

Mun Ingvar einnig taka á móti viðurkenningu sem einn af 101 áhrifamestu markþjálfum á heimsvísu sem Ingvar segir vera mikill heiður.

Bókin Hvar ertu og hvað viltu? eftir Ingvar Jónsson.

Hver ertu og hvað viltu? er fjórða bók Ingvars um markþjálfun og er gefin út af Forlaginu eins og  bókin „Sigraðu sjálfan þig“ sem kom út árið 2018 en hún seldist upp. Hann skrifaði einnig kennslubókina „Coaching – Bringing Out the Best“ árið 2017 og bókin „The Whole Brain Leader“ eftir þá Ingvar og Sjoerd de Waal var gefin út á Indlandi árið 2015 af hinu virta útgáfufélagi SAGE. Sú bók tvinnar saman markþjálfun og leiðtogafærni að sögn Ingvars sem sagði okkur frá nýju bókinni og markþjálfuninni.

Engin svona bók til

„Ég held að það sé engin svona bók til í heiminum í dag,“ segir Ingvar og hampar nýju bókinni. „Góður markþjálfi er góður í að nota myndlíkingar og þegar ég tala um tilfinningar, sérstaklega við karlmenn, þá endar það oft á að við tölum um veðurfar, það er miklu auðveldara. Það er skemmtilegt að segja frá því að við skrif á bókinni skrifaði ég mig upp á sker og ég var nánast hættur við að skrifa bókina. Þá fékk ég þessa hugmynd að skrifa bókina sem ferðalag. Hér ferðumst við á hugarfarinu. Þar er áhöfn sem samanstendur af þeim ábyrgðarhlutverkum sem við höfum öll í okkar lífi. Það eru líka farþegar á farinu, fólk sem við höfum einhverjar skyldur gagnvart. Ferðalagið gengur út á komast yfir Kyrrahafið (þar sem draumarnir sofa) upp fjóra vitundarstiga en stýrimaðurinn um borð er þín betri vitund á meðan þú sjálfur ert skipstjórinn. Stýrimaðurinn er í raun markþjálfi og þegar við komum við á Eyju hugrekkisins tekur stýrimaðurinn þig í göngutúr að hinum tólf uppsprettum hugrekkisins.“

Rétt er að geta að fremst og aftast í bókinni er vettvangur ferðalagsins sýndur með myndrænum hætti.

„Það eru tólf uppsprettur sem stoppað er við og þær merkja allt það sem þarf að snerta á í hverju samtali markþjálfans. Tilgangsdrifin hugsun er t.d. að ég hugsi markvisst um hluti sem hafa tilgang í mínu lífi. Við hverja uppsprettu fær stýrimaðurinn að spyrja þig nokkuð ágengra spurninga sem fá þig til að skoða þig í þessu ljósi. Þetta er svolítið skemmtilegt námsefni þar sem fólk er að læra um hæfnisþættina en þeir eiga við alla. Þegar þú ert búinn að fara með stýrimanninum umhverfis eyjuna þar sem þarf að gæta sín á hættum sem leynast á Kyrrahafinu eins og t.d. Straumum aðgerðarleysis, Hringiðu vanafestunnar og dramaþríhyrningnum sem er stórhættulegur staður. Ef þér tekst að forðast þessa strauma og endar bara ekki í grafreit tækifæranna, þá siglir þú upp sund sjálfsþekkingar og þegar þú kemst upp á Opna hafið sem er hafsvæði þar sem þú ert búinn að átta þig á því hver þú ert, hvað þú getur, hvað þú vilt og hvað þú vilt ekki. Þá þarftu ekki að taka neinar ákvarðanir bara af því að einhverjum öðrum finnst að þú ættir að gera það.“

Segir hann að þú getir ekki lært neitt nýtt nema geta tengt það með einhverjum hætti við eitthvað sem þú þekkir fyrir og því séu myndlíkingarnar til mikillar hjálpar við skilning á innihaldinu.

Útgáfuhóf á fimmtudag

Bókin Hver ertu og hvað viltu? fer í bókabúðir 14. janúar og í tilefni af útgáfu bókarinnar verður blásið til útgáfuhófs á fimmtudaginn 16. janúar kl. 17 í Matthíasarstofu í Bæjarbíó.

Ummæli

Ummæli

Tengdar greinar
- H1 -

Nýjustu greinar

H2