Félags- og vinnumarkaðsráðuneyti hefur úthlutað styrkjum til íslenskukennslu fyrir útlendinga á árinu 2023.
Alls bárust 19 umsóknir frá fyrirtækjum og stofnunum til þessara verkefna og fengu allir styrk. Ráðuneytið hækkaði upphæð til úthlutunar um rúmlega 87 m.kr. frá fyrra ári og úthlutaði alls 232,7 m.kr. til íslenskukennslu á árinu. Samtals fengu fyrirtæki og stofnanir styrki til þess að halda 804 námskeið fyrir 9.099 nemendur á árinu 2023. Það er um 44% fjölgun námskeiða og 42% fjölgun nemenda milli ára.
Það vekur athygli að ekki hefur verið sótt um styrki til íslenskukennslu í Hafnarfirði en um fimmtungur Hafnfirðinga er af erlendu bergi brotinn og nokkuð víst að margir þarfnast íslenskukennslu. Telja margir að góð íslenskukennsla sé forsenda farsællar aðlögunar útlendinga að íslensku þjóðfélagi.
Rannsókn og úttekt á íslenskukennslu
Guðmundur Ingi Guðbrandsson, félags- og vinnumarkaðsráðherra, hefur ákveðið að styðja við þrjár rannsóknir og úttektir á íslenskukennslu fyrir útlendinga, auk þess að láta framkvæma kerfisbundna greiningu á innlendum og alþjóðlegum ritrýndum rannsóknum sem varða framhaldsfræðslu. Á vegum félags- og vinnumarkaðsráðuneytis er nú unnið að heildarendurskoðun á framhaldsfræðslukerfinu og lögum um framhaldsfræðslu og eru verkefnin liður í þeirri vegferð.
Framhaldsfræðslu er ætlað að veita fólki með stutta skólagöngu ný tækifæri til náms og starfa. Eitt af því sem fram fer undir hatti framhaldsfræðslunnar er íslenskukennsla fyrir útlendinga. Vegna mikillar fjölgunar innflytjenda og flóttafólks hér á landi þykir mikilvægt að endurskoða íslenskukennslu sem fram fer utan formlega skólakerfisins og er miðuð að fullorðnu fólki með annað móðurmál en íslensku.
Nafn stofnunar |
Námskeið |
Nemendur | Úthlutun kr. |
Austurbrú | 20 | 200 | 6.000.000 |
Betri árangur | 10 | 130 | 3.450.000 |
Farskólinn – Miðstöð símenntunar á Norðurlandi vestra | 8 | 80 | 2.400.000 |
Fjölsmiðjan | 4 | 40 | 1.200.000 |
Fræðslumiðstöð Vestfjarða | 18 | 180 | 5.400.000 |
Fræðslunetið – símenntun á Suðurlandi | 37 | 422 | 11.880.000 |
Fræðslu- og símenntunarmiðstöð Vestmannaeyja ses | 18 | 140 | 4.800.000 |
Kópavogsbær | 7 | 105 | 2.625.000 |
MSS – Miðstöð símenntunar á Suðurnesjum | 79 | 790 | 23.700.000 |
Mímir-símenntun | 151 | 1795 | 49.575.313 |
Múltikúlti-íslenska | 132 | 1320 | 25.080.000 |
Retor sf. Fræðsla | 82 | 1066 | 28.290.000 |
Reykjavíkurborg | 14 | 200 | 4.545.000 |
Saga-Akademía | 40 | 320 | 8.800.000 |
Samband íslenskra kristniboðsfélaga | 10 | 260 | 2.520.000 |
Símenntunarmiðstöð Eyjafjarðar | 29 | 348 | 9.570.000 |
Símenntunarmiðstöðin á Vesturlandi | 14 | 140 | 4.200.000 |
Tungumálaskólinn ehf. | 101 | 1263 | 34.114.687 |
Þekkingarnet Þingeyinga | 30 | 300 | 4.500.000 |
804 | 9099 | 232.650.000 | |