Eigendur íbúðarhúsnæðis í Hafnarfirði munu á næstunni fá sérstaka viðbótarlækkun á fasteignasköttum miðað við áður útgefna álagningu.
Verður álagningarprósenta fasteignaskatts á þessu ári lækkuð úr 0,246% í 0,223%.
Í tilkynningu frá Hafnarfjarðarbæ er þetta sagt til þess að koma til móts við hækkun fasteignamats. Þetta sé í samræmi við fyrri ákvörðun bæjarstjórnar Hafnarfjarðar um að lækka fasteignagjöld að meðaltali í bænum til mótvægis við hækkun fasteignamats, að teknu tilliti til verðlagsþróunar.
„Í framhaldi af útsendingu álagningar fasteignagjalda í byrjun árs kom í ljós að útreikningar reyndustu ekki réttir, þannig að markmið með lækkun fasteignagjalda skilaði sér ekki að fullu til íbúa.“
Þetta er sagt verða leiðrétt og eigendur íbúðarhúsnæðis í Hafnarfirði fái að fullu að njóta lægri fasteignagjalda á þessu ári í samræmi við loforð meirihluta bæjarstjórnar Hafnarfjarðar.
„Við ákváðum að lækka álagningu fasteignagjalda í Hafnarfirði verulega til þess að koma til móts við umtalsverða hækkun fasteignamats,“ segir Rósa Guðbjartsdóttir bæjarstjóri í tilkynningu.
Hækkar þá um 10,6% á milli ára
Við þessa lækkun á álagningu ætti hækkun fasteignaskatts á íbúðarhúsnæði þá að vera um 10,6% að jafnaði miðað við að fasteignamat hafið hækkað um 22% að jafnaði.
Hins vegar kemur fram í svari við fyrirspurn fulltrúa Samfylkingar í bæjarráði að tekjur af fasteignaskatti muni aukast um 15,6% á síðasta ári og tekjur af lóðarleigu um 24,8%.
