Breytingar verða gerðar á þjónustu Póstsins í Hafnarfirði 1. júní næstkomandi þegar pósthúsinu við Fjarðargötu verður lokað.
Pósturinn mun þó áfram sinna póstþjónustu í bænum en með breyttu sniði og áherslu á aðrar þjónustulausnir skv. tilkynningu frá Íslandspósti.
„Við erum ávallt að leita leiða til að þróa þjónustuna í takt við breyttar þarfir og kröfur neytenda samhliða hagkvæmum rekstri,“ segir Kjartan Flosason, forstöðumaður pósthúsa.
„Póstþjónusta á Íslandi hefur tekið stórfelldum breytingum á síðastliðnum árum og það hafa þarfir viðskiptavina einnig gert. Þeir vilja geta sótt sendingar á sínum forsendum eða fá þær keyrðar heim til sín. Við höfum fundið fyrir mikilli ánægju viðskiptavina með sjálfvirkar afhendingarleiðir og ánægðustu viðskiptavinir okkar eru þeir sem nota Póstbox, enda eru þau einföld og þægileg leið til að sækja og senda, staðsett víða og opin allan sólarhringinn.“
Sjö póstbox í Hafnarfirði
Eftir breytingarnar verða þrjú pósthús á höfuðborgarsvæðinu og 28 póstbox, þar af eru sjö póstbox í Hafnarfirði. Einnig verður fyrirtækjaþjónusta í boði; útkeyrsla á kvöldin og bréfadreifing ásamt póstkössum.
Þau sem voru með afhendingarval skráð á pósthúsinu í Hafnarfirði verða sjálfkrafa skráð á næsta þjónustupósthús, þ.e. pósthúsið á Dalvegi í Kópavogi. Þetta gildir einnig um þau sem ekki hafa tilgreint afhendingarval en hægt er að breyta afhendingarvali eftir hentugleika í Póst-appinu og á Mínum síðum á heimasíðu Póstsins, www.posturinn.is. Dreifing bréfa verður með óbreyttu sniði.
