Nýr organisti Víðistaðakirkju gefur út lag tileinkað minningu vinar sem féll fyrir eigin hendi

Kyrrðar- og samverustund í tilefni af alþjóðlegum forvarnardegi sjálfsvíga

Í tilefni af alþjóðlegum forvarnardegi sjálfsvíga, verður haldin kyrrðar- og samverustund í Víðistaðakirkju í kvöld, fimmtudag kl. 20.

Alþjóðlegur forvarnardagur sjálfsvíga er 10. september. Tilgangur dagsins er að stuðla að forvörnum sjálfsvíga og minnast þeirra sem fallið hafa fyrir eigin hendi.

Margir þjást vegna sjálfsvíga ástvina. Stundin er ætluð til að mæta þeim einstaklingum, styðja, styrkja og minnast. Kveikt verður á kertum í minningu þeirra sem látnir eru og fólk sem misst hefur ástvini gefið tækifæri til að koma saman, hlýða á uppörvandi orð, hugleiðingu aðstandenda og leyfa tónlistinni að hreyfa við sér.

Sr. Bragi Ingibergsson leiðir stundina, Hafdís Huld Þórólfsdóttir flytur hugleiðingu og um tónlistarflutning sjá þau Ásta Marý Stefánsdóttir, Benedikt Sigurðsson og Sveinn Arnar Sæmundsson, nýr organisti Víðistaðakirkju.

Nýr organisti hefur gefið út lag með texta um huggun og von

Sveinn Arnar Sæmundsson, nýr organisti Víðistaðakirkju.

Sveinn Arnar kom til starfa í Víðistaðakirkju 1. september sl. eftir 19 ára starf á Akranesi. Segir Sveinn Arnar að honum lítist afar vel á kirkjuna og þann fallega bæ sem Hafnarfjörður er.

Sveinn Arnar gaf í gær út nýtt lag sem hann samdi. Lagið er tileinkað minningu vinar hans, Lárusar Dags, sem féll fyrir eigin hendi fyrir tæpum tveimur árum. Tileinkar hann það þó einnig öllum þeim sem eiga ástvini sem hafa hvatt þennan heim. Í textanum er huggun og von.

Lagið er tekið upp af Baldri Ketilssyni, Hafþór Karlsson sá um hljóðvinnslu og myndbandið er gerði Heiðar Mar Björnsson.

 

Ummæli

Ummæli