Grásleppukarla- og hernámssýning hefst í dag

Sumaropnun hefst á Byggðasafni Hafnarfjarðar í dag, á 112 ára afmælisdegi bæjarins 1. júní, með opnun á tveimur nýjum sýningum. Þemasýning um grásleppukarla opnar í Pakkhúsi og ný hernámssýning hefur verið sett upp á Strandstíg.

Ný þemasýning í Pakkhúsinu

Í Pakkhúsinu eru að öllu jöfnu þrjár sýningar í gangi í einu, fastasýning um sögu bæjarins, leikfangasýning og þemasýning. Ný þemasýning sem opnuð hefur verið í forsal Pakkhússins segir frá grásleppukörlum og smábátaútgerð í bænum.

Um aldir sóttu Hafnfirðingar sjóinn á árabátum en í upphafi 20. aldarinnar hófst vélvæðing smábátaútgerðarinnar sem þróaðist áfram þar til hún náði ákveðnum hátindi í bænum á sjöunda og áttunda áratuginum. Leitast er við að varpa ljósi á þessa sögu á sýningunni.

Til að minnast þess að nú eru liðin 80 ár frá hernámi Íslands í síðari heimsstyrjöldinni hefur Byggðasafnið sett upp ljósmyndasýninguna „Hafnarfjörður á hernámsárunum 1940 – 1945“. Sýningin hefur verið sett upp á Strandstígnum meðfram höfninni, allt frá Drafnarslipp og út Herjólfsgötu, en þar er að finna um 50 ljósmyndir sem varpa ljósi á þetta tímabil í sögu bæjarins.

Fred, Hörður og Harry.