Verktakar vinna nú hörðum höndum við að leggja rör fyrir ljósleiðara í Hafnarfirði en flest hverfi eru þegar tengd. Menn taka eftir að nú er aðeins grafinn einn skurður og tvö rör lögð inn í hvert hús en Gagnaveitu Reykjavíkur og Mílu var gert að sameinast um skurði til að minnka rask í götum og í lóðum íbúanna. Þurfut fyrirtækin reyndar að sækja um leyfi frá Samkeppnisstofnun til þessa samstarfs og fékkst það leyfi fyrr á árinu.
Flest hverfi í Hafnarfirði eru þegar komin með ljósleiðaratengingu og því spennandi að vita hvenær allir bæjarbúar eigi þess kost að tengjast ljósleiðaranum.
Jóhann Sveinn Sigurleifsson er í framkvæmdastjórn Gagnaveitu Reykjavíkur, hefur búið í Hafnarfirði alla sína ævi og svaraði spurningum Fjarðarfrétta um ljósleiðaravæðinguna í Hafnarfirði.
Hvaða hverfi er enn eftir að tengja í Hafnarfirði og hvenær reiknið þið með því að ljúka tengingum?
Við vinnum nú fullum fetum að því að klára síðustu hverfin í Hafnarfirði og eigum raunar aðeins eftir að tengja heimili í Setbergi og hluta af Völlunum. Við erum að klára að ljósleiðaravæða allt þéttbýli höfuðborgarsvæðisins við lok þessa árs. Því ættu öll heimili í þéttbýli Hafnarfjarðar að hafa kost á Ljósleiðaranum í árslok.
Enginn kostnaður
Jóhann Sveinn segir framkvæmdir í Hafnarfirði hafi gengið mjög vel, enda tekið vel á móti framkvæmdaraðilum í hvívetna. Segir hann lagningu ljósleiðarans vera íbúum að kostnaðarlausu og auki valmöguleika og lífsgæði þeirra sem nýta ljósleiðarann.
Hvaða þýðingu hefur það fyrir íbúa að geta tengst ljósleiðaranum?
Ég er auðvitað ljósleiðaramaður út í eitt og var raunar áður en ég hóf störf við ljósleiðarann og tel það grundvallarlífsgæði að hafa ljósleiðaratengingu. Gott dæmi um það er að við fjölskyldan fluttum fyrir 2 og hálfu ári og við skoðuðum aðeins eitt hús þar sem ljósleiðarinn var ekki kominn inn. Það hús varð ekki fyrir valinu heldur núverandi ljósleiðaratengt hús á Völlunum. Með ljósleiðaranum opnast möguleikar á að nýta fullum fetum öll þau gæði sem Netflix og önnur sambærileg þjónusta hefur upp á að bjóða án þess að hafa áhyggjur af því að önnur þjónusta takmarkist á meðan. Á stórum heimilum, með Eitt gíg þjónustu, geta þannig allir heimilismeðlimir horft á 4K UHD efni samtímis án þess að það hafi of takmarkandi áhrif á netnotkun sem oft fer fram samtímis. Það kannast flestir við það multitasking sem við gerumst öll sek um, horfandi á þátt og skoðandi Facebook eða annað viðlíka í snjalltækjunum á sama tíma.
„Ein heimsókn“
Í sumum tilfellum þarf að breyta lögnum innanhúss en þá erum við með snillinga í vinnu hjá okkur sem afgreiða það við uppsetningu á ljósleiðaraboxinu. Þessi þjónusta sem við köllum Ein heimsókn hefur fengið alþjóðleg verðlaun. Í heimsókninni er allt klárað sem viðkemur virkjun Ljósleiðarans auk tengingar við beini (e. router), heimasíma og myndlykil þar sem hann er til staðar. Viðskiptavinur Ljósleiðarans verður ekki fyrir neinum kostnaði vegna uppsetningar og borgar einungis mánaðargjöld fyrir fjarskiptaþjónustu um Ljósleiðarann.
Verður ljósleiðaratenging mikið dýrari fyrir íbúa?
Ljósleiðaratenging er og hefur verið á samkeppnishæfum verðum við aðrar tengingar. Því ætti ekki að vera kostnaðaraukning hjá þeim sem uppfæra þjónustuna frá öðrum leiðum. Ég hvet alla til að prófa Ljósleiðarann og upplifa Eitt gíg í báðar áttir enda er Ljósleiðarinn fyrir mér eins og áður kom fram grundvallar lífsgæði sem allir ættu að njóta og sést einnig á markmiðum ríkisstjórnarinnar um „Ísland ljóstengt“.
