Bærinn krafinn um bakábyrgð vegna lífeyris starfsmanna Sparisjóðs Hafnarfjarðar

Hafnarfjarðarbær verst innheimtukröfum Brúar lífeyrissjóðs

Sparisjóður Hafnarfjarðar

Brú lífeyrissjóður, áður Lífeyrissjóður starfsmanna sveitarfélaga, hefur tilkynnt Hafnarfjarðarbæ að sjóðurinn muni byrja að innheimta greiðslur vegna bakábyrgðar bæjarins um næstu mánaðarmót.

Tekur til varna

Bæjarráð fór á fundi sínum í gær yfir innheimtukröfu Brúar lífeyrissjóðs á hendur Hafnarfjarðarkaupstað vegna meintrar bakábyrgðar bæjarins og samþykkti með vísan til athugasemda með ársreikningi að taka til varna.

Krafan snýst um meinta bakábyrgð Hafnarfjarðarbæjar á lífeyrisskuldbindingum vegna fyrrum starfsmanna Sparisjóðs Hafnarfjarðar sem heimilt hafði verið að vera í Eftirlaunasjóði starfsmanna Hafnarfjarðarbæjar. Telur bærinn sig ekki bera ábyrgð á skuldbindingum umfram það sem viðkomandi starfsmenn lögðu í sjóðinn.

Sparisjóður Hafnarfjarðar fékk á árinu 1973 aðild að sjóðnum fyrir starfsfólk sitt og ábyrgðist lífeyrisgreiðslur til þeirra. Við sameiningu sparisjóða gekk Sparisjóður Hafnarfjarðar inn í Byr sparisjóð. Þann 2. nóvember 2012 gekk dómur í Hæstarétti í máli Lífeyrissjóðs starfsmanna ríkisins gegn SPRON sem hefur afgerandi áhrif á ágreining eftirlaunasjóðsins við þrotabú Byrs sparisjóðs.

Samkvæmt dómnum er lífeyrisskuldbinding ekki viðurkennd sem forgangskrafa en slitastjórn sparisjóðsins hefur samþykkt kröfu eftirlaunasjóðsins sem almenna kröfu en skuldbindingin var færð í ársreikning 2012 til hækkunar á lífeyrisskuldbindingu sveitarfélagsins.

Óvissa ríkir um hversu hátt hlutfall greiðist upp í almennar kröfur sparisjóðsins en Hafnarfjarðarbær mun leita allra hugsanlegra leiða til að kanna réttarstöðu sína gagnvart þrotabúinu og ábyrgðinni á skuldbindingunni.

Á árinu 2015 hækkaði skuldbinding um 152,1 millj.kr. vegna fyrrum starfsmanna sparisjóðsins.

Ummæli

Ummæli

Skilja eftir athugarsemd

Please enter your comment!
Please enter your name here