Úlfur, úlfur:

Hræðsluáróður pólitískur leikur

222
Adda María Jóhannsdóttir

Nú þegar sveitarfélög eru að birta ársreikninga fyrir árið 2016 kemur í ljós að staðan er að batna mikið og jafnvel mun meira en áætlanir gerðu ráð fyrir. Það er margt sem veldur. Launahækkanir hafa gefið meiri útsvarstekjur og lægri verðbólga hefur þýtt minni verðbætur svo eitthvað sé nefnt. Niðurstaðan er víða mun betri en undanfarin 10-15 ár. Það eru því fyrst og fremst ytri aðstæður sem þakka má bætta afkomu sveit­ar­félaga.

Nauðsynleg hagræðing eða hræðsluáróður?

Við þetta tækifæri má velta fyrir sér í hvað fjármunum er eytt og kannski enn frekar í hvað þeim er ekki eytt. Á fyrri hluta kjörtímabils var ráðist í miklar hagræðingaraðgerðir sem fulltrúar Samfylkingar og Vinstri grænna gagn­rýndu á sínum tíma. Miðað við áætlanir var þá þegar ljóst að betri tíð væri í vændum og því átti að vera ráðrúm til að hefja endurgjöf í þjónustu við bæjarbúa.

Ég skil t.a.m. ekki enn hvers vegna ráðist var í lokanir á leikskólaúrræðum við þessar aðstæður. Við stóðum frammi fyrir einstöku tækifæri til að lækka inntökualdur á leikskóla þar sem pláss voru að losna við það að stórir árgangar leikskólabarna voru að fara í grunnskóla. Meirihluti Sjálfstæðis­flokks og Bjartrar framtíðar taldi hins vegar að loka þyrfti leikskólaúrræðum í hagræð­ingarskyni. Niður­stað­an er sú að Hafnarfjörður er að verða á eftir öðrum bæjar­félögum í því að lækka inn­tökualdur barna á leikskóla. Auk þess eru hverfi í Suðurbæ enn í þeirri stöðu að vera án leik­skóla og börn á því svæði þurfa mörg hver að sækja leikskóla um langan veg.

Pólitískur leikur

Það má spyrja sig um tilgang þess að mála stöðu bæjarins svartari litum en efni stóðu til í upphafi kjörtímabils. Nú þegar einungis rúmt ár er til næstu kosninga kemur þó sífellt betur í ljós að fréttum af batnandi afkomu hefur verið haldið niðri allt þar til nú, þegar núverandi meirihluti sér hag í því að halda þeim fréttum á lofti, í þeim tilgangi að eigna sér árangurinn. Staðreyndin er hins vegar sú að ytri þættir hafa skapað góðar aðstæður fyrir sveitarfélögin sem skilar sér í bættri afkomu, og er það vel. Og þar sem styttist í kosningar er kannski einhver von til að bæjarbúar njóti góðs af.

Adda María Jóhannsdóttir, bæjarfulltrúi Samfylkingar

Ummæli

Ummæli