Í dag er friðardagur

Eyrún Ósk Jónsdóttir skrifar

44
Eyrún Ósk Jónsdóttir

Í dag 21. september er hinn árlegi alþjóðlegi friðardagur Sameinuðu þjóðanna. Í ár öðlast hann þó dýpri merkingu en fyrr. Frá og með í gær, 20. september, geta þjóðir heims staðfest sáttmála um bann við kjarnorkuvopnum sem liggur fyrir hjá Sameinuðu þjóðun­um. Þetta er metnaðarfyllsta tilraun sem gerð hefur verið til þess að uppræta þessa skelfi­legu ógn og eitt stærsta skref sem tekið hefur verið í friðar- og öryggismálum heimsins.

122 þjóðir komu að sáttmál­anum en því miður var Ísland ekki þar á meðal. Okkur gefst þó annað tækifæri nú til að staðfesta sáttmálann.

Stjórn Samfylkingarinnar í Hafnar­firði sendi frá sé ályktun þar sem hún skorar á stjórnvöld að staðfesta sátt­málann. Þar segir: ,,Kjarnorkuvopn eru ein skelfilegasta ógn við umhverfi jarðar og líf jarðarbúa. Eyðingarmáttur þessarar hræðilegu váar er nægilegur til að eyða öllu lífi á jörðinni. Sá sem lætur sig varða umhverfismál, mannréttinda­mál og dýraverndunarmál hlýtur að krefjast þess að slík tortímingartól verði bönnuð. Það eru hreinir hagsmunir mannkynsins og umhverfisins að Ísland taki afstöðu gegn slíkum tortímingar­tólum. Þetta er málefni sem snertir hverja manneskju, hvert bæjarfélag og hverja þjóð jarðarinnar. Andstæðingar slíks banns hafa borið fyrir sig hug­myndina um fælingarmátt kjarnorku­vopna, gamaldags hugsunarhátt sem gengur út á að hægt sé að tryggja frið með ótta við kjarnorkustyrjöld. Hug­myndir um að hægt sé að byggja vináttu og traust á grunni hótanna um tortímingu eru í besta falli afkáralegar. Við teljum gríðarlega mikil­vægt að við, sem herlaus, friðelskandi þjóð skorumst ekki undan ábyrgð í svo mikilvægu máli.“

Kjarnorkuvopn eru birting­ar­mynd á mannvonsku. Fæling­armáttur kjarnorkuvopna er líkt og að bjóða vini með sér á kaffihús og taka með sér hlaðið skotvopn og ætlast til að hægt sé að byggja vináttu á slík­um grunni.

Ég trúi að baráttan fyrir friði eigi sér tvær hliðar. Annarsvegar þurfum við að framkvæma fyrir frið. T.d. mótmæla óréttlæti og þrýsta á stjórnvöld að taka afstöðu gegn kjarnorkuvopnum. Hins vegar fer baráttan fram í hjörtum okkar. Þar þurfum við að hafna hatri og finna kærleika í garð samferðarmanna okkar. Þetta tvennt helst í hendur. Ef við sem þjóð tökum hugrakka afstöðu gegn kjarnorkuvopnum þá um leið sigrum við innri baráttuna, þá erum við að hafna hatri.

Eyrún Ósk Jónsdóttir
rithöfundur og vara­bæjarfulltrúi Samfylkingarinnar.

Greinin birtist í Fjarðarfréttum
– fréttablaði Hafnfirðinga 21. september 2017

Ummæli

Ummæli